29 қаңтар 2025, 17:50 760

ҚТЖ Балқаш – Мойынты учаскесінде екінші жол бойынша пойыздар қозғалысын ашты

Достық – Мойынты теміржол учаскесіндегі екінші жолдары құрылысы аясында «Қазақстан темір жолы» Мойынтыдан Балқашқа дейінгі жүк пойыздарының екі жолды қозғалысын мерзімінен бұрын ашты.

127 шақырымдық учаскеде белгі беру, орталықтандыру және блоктау құрылғыларын қосу сәтті аяқталды. Жаңа инфрақұрылым мобильді диагностикалық кешенмен тексерілді.

Достық – Мойынты теміржол учаскесінде ұзындығы 836 км екінші жолдарды салу жобасын аяқтау ағымдағы жылдың жазында жоспарлануда. Құрылыс жұмыстарының көп бөлігі аяқталуға жақын. Бүгінгі таңда рельсті шпал торы 769 км-ге төселген, жер жұмыстарының 99% орындалған. Темірбетон құбырларын орнату (259-дан 255), көпірлерді орнату (92-ден 88) аяқталады. БОБ, байланыс және энергиямен жабдықтау жүйелерінің құрылысы жүргізілуде. 630 км-ден астам түрлі кабель тартылып, жоғары вольтты желіге 12 998 тірек орнатылды.